عاداتنا واكلاتنا ؟؟؟!!!

السلام عليكم ورحمه الله وبركاته

تحية طيبة للجميع

بدخل في الموضوع على طول عشان ما اقلقكم ولا اقلق نفسي ... بصراحة فكرة هالموضوع

تدور في راسي لمدة اسبوع لكن بحكم اني انسان مزاجي وما عندي وقت ولكن بعد ما وجدت

هالفرصة قلنا نسدح الموضوع وانا اتمنى ما تحرمونا من شطحاتكم وارائكم وافكاركم... والمايك بيكون

لكل واحد بيدخل الموضوع...

++++++++++++++++++++++++++++++++++++++++++++

بصراحة حنا يا المجتمع السعودي نقدر شي اسمه (كبسة) فتحداكم تحدي وبيني وبينكم (500 ريال)

واللي قد التحدي يطلع قدامي ويدفع والوعد اخر الشهر اردها له

كل انسان يشمز من اكله معينه فانا على سبيل المثال (ما احب اكل ورق العنب) يعني لو تعطيني مبلغ

من المال وتقول اكل ورق العنب فمستحيل اكل هالعينة من الاكل.

قبل خمس سنوات تقريبا كنت انا ويا الاخ مجنون في دولة سوريا (في احدى مطاعم الربوة في الشام)

وكعادة تلك المطاعم يقدمون لنا قبل الاكل (كبة) طبعا (الكبة) شبيهه جدا لفلافل، بصراحة انا ما احب

هالعينة وكبدي تقلب علي اما الاخ مجنون (ما شفته الا ياكل الكبه اللي موضوعه لي وموضوعه له) ويقول

لي اكل يا رجال ترى طعمها يعجبك... قلت ابدا مسموح مني وبالعافية عليك... انتهى

++++++++++++++++++++++++++++++

اهل نجد قبل 30 سنه ما كانوا ياكلون شي اسمه (سمك) ومستحيل استحالة تامة تجد بيت

يسوي اكلة فيها (سمك) او ياكلون هالاكلة.

لكن سبحان مغير الاحوال تغيروا حبة حبة واصبحوا ياكلون هالاكلة

وكما يقال بان شخص ينتمي لقبيلة من قبايل نجد تم تعيينه في المنطقة الشرقية في شركة ارامكو

قبل 20 سنه طبعا هالشخص اخذ من ثقافة وطبائع اهل المنطقة الشرقية واصبح يفضل اكلة (السمك)

لانه وجد فيها الفائدة الصحية واصبحت من الاكلات الاسبوعية المفضلة لديه.

طبعا البعض من افراد قبيلته من نجد رغبوا في زيارته في المنطقة الشرقية وكان لهم ما ارادوا

حيث سافروا له وعند الوصول له في بيته، حلف عليهم بان يكرمهم وتمموا له (وافقو له)<< وهذا من عاداتنا الحسنة (اكرام الضيف).

طبعا هالرجال احب ان يكرمهم وقدم لهم مادبة غداء تشمل انواع الاسماك (من وإلى) طبعا هالضيوف

قاموا على كرامتهم( الغداء) وبعد ما شافوا ان غداءهم كان اسماك في اسماك (ما جلسوا) وجميعهم

رفض انه يجلس وكل واحد قال (افا يا ابو فلان تغدينا سمك ، ما توقعناه منك) طبعا الرجال (المعزب)

حلف عليهم بان يجيب لهم غداء ثاني، وبعد نص ساعة احضر لهم (خروف من احدى المنادي) وقال لهم

سموا الله يحيييكم على هالخروف اللي قيمته 800 ريال وهذي كرامتكم، لكن يعلم الله ان الغداء(سمك)

اللي قمتوا منه ورفضتوا تاكلونه (ان قيمته حوالي 4000 ريال).... انتهى

ما اريد ان اطيل عليكم في الحديث... ولكن لنا بقية في الحديث معكم فالمايك للي بعدي...

والمجال مفتوح للجميع ...

فهل عاداتنا واكلاتنا لازالت مسيطره على عقول البعض منا؟

وهل انت من الاشخاص اللي يشمزون من بعض الاكلات؟

تقبلوا فائق تحياتي،،،